A estrela caboverdiana, abandeirada do pop tropical e afincada en Lisboa, vén de lanzar o seu quinto álbum, ‘Manga’, en crioulo e en portugués. Nel regresa aos sons da música africana do continente (foi gravado en Abidjan e París) coas súas raíces caboverdianas. Neste traballo traza unha delgada liña que oscila entre o urbano, o afrobeat e a música tradicional do seu país. Colabora Kim Alves, o famoso multiinstrumentista da illa, canda unha nova xeración de músicos do Occidente africano e o produtor de Costa do Marfil 2B.

A súa música é fresca e versátil. Un cóctel onde reformula a súa música materna e explora os sons tropicais. Non somos quen de atopar unha definición exacta do seu estilo, pero a súa música evoca a Cabo Verde, á costa brasileira, e ás zonas desérticas africanas. A súa música soa a verán. É unha mestura de cores radiantes que bailan, ritmos de veludo e melodías que arrecenden. A súa voz está sutilmente sazonada con pementa, como se a Europa do pop fose sempre un arquipélago tropical. As súas cancións evocan o verán eterno cunha pinga de exotismo. Cantadas en crioulo caboverdiano, inglés e portugués, os temas falan de romanticismo, sensualidade… Pop tropical.

A súa intención é facer música “que reflicta a miña vida”. E como é a súa vida? Naceu por accidente na Habana (o seu pai loitou pola independencia caboverdiana, que foi apoiada por Cuba), e viviu en Praia (Cabo Verde), pero tamén en Senegal, Angola e Alemaña. Ela é da illa de Santiago, onde os estilos musicais son máis percusivos, rítmicos e africanos (funana e batuque).

Logo de facerse popular gañando algún concurso de canción en 2006 publica o seu primeiro álbum, ‘Navega’, que remitía as súas raíces musicais. O segundo, ‘Stória, Stória…’, realizouno entre París, Brasil e Cuba. E logo chegaría ‘Studio 1050’, ‘Lovely difficult’…

© Cantos na Maré 2019 | Todos os dereitos reservados